У верасні 2021 года паміж дзвюма жыхаркамі Наваполацка пачалі псавацца адносіны, у перапісцы з’явіліся абразы. На гэтым усё магло і скончыцца, калі б не прынцыповасць адной з іх — у выніку справа дайшла да суда. Дэталі гэтай гісторыі «Люстэрка» знайшло ў банку судовых рашэнняў — расказваем, як усё было.
Імёны ў тэксце выдуманыя, бо ў судовай пастанове схаваныя асабістыя звесткі.
Жыхарка Наваполацка Вікторыя пазнаёмілася з Анжалікай у 2019 годзе. Паводле першай, сяброўкамі яны не былі, але перыядычна камунікавалі. Канфлікт пачаўся ў верасні 2021 года. Тады Анжаліка пачала дасылаць Вікторыі абразы ў Viber, «тым самым наўмысна зневажаючы яе гонар і годнасць у непрыстойнай форме». Што менавіта стала прычынай — невядома. У судовым рашэнні толькі згадваецца, што гэта адбылося «на глебе рэўнасці».
Атрымаўшы некалькі абразаў, Вікторыя вырашыла не спускаць усё на тармазах. Жанчына звярнулася ў Наваполацкі ГАУС з заявай. І 30 верасня 2021 года Анжаліку прызналі вінаватай у парушэнні ч. 1 арт. 10.2 КаАП (Абраза, то-бок наўмыснае прыніжэнне гонару і годнасці асобы, выказанае ў непрыстойнай форме) і аштрафавалі на тры базавыя велічыні (87 рублёў). Прычым сама крыўдзіцелька з такім рашэннем пагадзілася і абскарджваць яго не стала.
А вось Вікторыя пайшла далей і склала грамадзянскі пазоў. На паседжанні яна ўдакладніла, што Анжаліка пісала ёй «неаднаразова», у тым ліку начамі, не даючы спаць. Абразлівыя паведамленні прыносілі «маральныя пакуты», бо яна ўспрымала паведамленні блізка да сэрца, але пры гэтым «не давала падставаў для рэўнасці». Таму Вікторыя была ўпэўненая, што абразы беспадстаўныя, і папрасіла суд абавязаць яе знаёмую выплаціць маральную кампенсацыю ў 500 рублёў і кампенсаваць судовыя выдаткі.
Анжаліка ж, хоць і не спрачалася з рашэннем падчас адміністрацыйнага працэсу, з грамадзянскім пазовам была не згодная. Яна «аспрэчвала матывы пазову», але як менавіта, не ўдакладняецца.
Выслухаўшы абодва бакі, паказанні сведак і даследаваўшы пісьмовыя доказы, суд стаў на бок Вікторыі. Праўда, памер маральнай шкоды ацаніў у крыху меншую суму — 300 рублёў. Таксама Анжаліка мусіць кампенсаваць судовыя выдаткі знаёмай — 158 рублёў.
Чытайце таксама
