Прэзідэнт ЗША Дональд Трамп не выключае магчымасці адпраўкі Украіне дальнабойных ракет Tomahawk. Абмеркаванне гэтага пытання ішло ў мінулую пятніцу. Пра гэта піша аглядальнік Washington Post Дэвід Ігнаціус, спасылаючыся на сваю крыніцу.
На мінулым тыдні Трамп пацікавіўся ў Зяленскага, чаму той не ўдарыў па Маскве. «Мы можам, калі вы дасце нам зброю», — адказаў украінскі прэзідэнт. Трамп заявіў, што Украіне трэба ўзмацніць ціск на Пуціна, прычым не толькі на Маскву, але і на Санкт-Пецярбург, перадае Ігнаціус словы крыніцы, знаёмай з ходам перамоваў.
Трамп вырашыў абвастрыць сітуацыю з трох прычын. Па-першае, ён лічыць, што Пуцін дэманструе да яго непавагу, удаючы гатоўнасць да міру, але ігнаруючы заклік прэзідэнта ЗША спыніць агонь. Па-другое, ён бачыў эфектыўнасць ваеннай моцы ЗША ў выкарыстанні бамбавікоў B-2 і ракет Tomahawk супраць Ірана. І, па-трэцяе, ён лічыць, што Пуцін пойдзе на перамовы толькі пад пагрозай выкарыстання большай сілы. Як любяць казаць расіяне, Трамп вырашыў «абвастрыць сітуацыю дзеля дээскалацыі», расказала яшчэ адна крыніца, знаёмая з ходам абмеркаванняў у адміністрацыі амерыканскага прэзідэнта.
Tomahawk — сямейства амерыканскіх шматмэтавых высокадакладных крылатых ракет вялікай далёкасці стратэгічнага і тактычнага прызначэння падводнага, надводнага і сухапутнага базавання. Здзяйсняе палёт на памежна малых вышынях з абыходам рэльефу мясцовасці. Далёкасць (у залежнасці ад мадыфікацыі) — 870 — 2500 кіламетраў, класічны варыянт — 1600 — 1800 кіламетраў.
Да гэтага часу самай дальнабойнай зброяй, якую ЗША перадавалі Украіне, былі ракеты ATACMS з далёкасцю палёту 300 км.
Нагадаем, на сустрэчы з генеральным сакратаром NATO Маркам Рутэ 14 ліпеня прэзідэнт ЗША Дональд Трамп паведаміў, што незадаволены Пуціным і што Злучаныя Штаты гатовыя рэзка ўзмацніць ціск на Расію, калі цягам найбліжэйшых 50 дзён не будзе дасягнутае мірнае пагадненне па Украіне. Паводле яго, Вашынгтон увядзе так званыя другасныя тарыфы ў памеры 100% у дачыненні да РФ.
Таксама ён паабяцаў, што ЗША забяспечаць Украіну буйнымі пастаўкамі ўзбраенняў, уключаючы сістэмы СПА, ракеты і боепрыпасы.
У прыватнасці, са словаў Трампа, новыя пастаўкі зброі з ЗША будуць уключаць у тым ліку сістэмы Patriot. Ён дадаў, што разглядаецца магчымасць перадачы 17 такіх комплексаў, некалькі з іх — ужо «найбліжэйшымі днямі».
Між тым у Еўропе словамі Трампа былі расчараваныя. Як напісаў нямецкі часопіс Spiegel, еўрапейскія палітыкі чакалі больш значных мер Вашынгтона супраць Масквы.
