У Вінніцы падчас начной атакі пацярпеў польскі завод Barlinek Group. Пра гэта паведаміў кіраўнік МЗС Польшчы Радаслаў Сікорскі.
«Дырэктар завода толькі што паведаміў мне, што гэта быў наўмысны напад з трох кірункаў. Ёсць пацярпелыя, у тым ліку двое з цяжкімі апёкамі. На месцы здарэння працуюць украінскія службы, уключаючы нашае консульства. Злачынная вайна Пуціна набліжаецца да нашых межаў», — напісаў Сікорскі ў Х.
У ноч на 16 ліпеня Расія атакавала Вінніцкую, Днепрапятроўскую, Харкаўскую і Адэскую вобласці Украіны. Як паведаміў прэзідэнт Украіны Уладзімір Зяленскі, адной з мішэняў была эннргетычная інфраструктура. Раненні атрымала не менш за 15 чалавек.
У Вінніцы ў выніку атакі пацярпела восем чалавек. Пад удар трапілі два цывільныя прадпрыемствы, там успыхнулі маштабныя пажары. Таксама пашкоджаныя чатыры жылыя дамы.